അടുത്തുള്ള നല്ല സ്ഥലങ്ങള്‍ ആസ്വദിക്കാതെ ദൂരദിക്കുകള്‍ തേടി പലപ്പോഴും നമ്മള്‍ ഇറങ്ങാറുണ്ട്‌. ഒരിക്കല്‍ പോലും കരിയാത്തുംപാറ യാത്ര ഡയറിയില്‍ കയറിപറ്റാതെ പോയതെന്തേ എന്നൊരു ചോദ്യത്തിനു ഇനി പ്രസക്തിയില്ല.
കാരണം കോഴിക്കോടിന്റെ മുറ്റത്തുള്ള ഈ സ്വപ്ന തീരത്ത് ഞങ്ങളെത്തിക്കഴിഞ്ഞു. ഒരു നിമിഷം കൊണ് നമ്മള്‍ അറിയാതെ ഈ പ്രകൃതിയുടെ ഭാഗമായി തീരും. തടാകത്തില്‍ നീന്തികളിക്കുന്ന താറാവുകള്‍ക്കൊപ്പം നമ്മളും നീന്തിത്തുടിക്കും.
അക്കരെ നിന്നും ഇക്കരേക്കും തിരിച്ചും സവാരി നടത്തുന്ന കാറ്റിനൊപ്പം നമ്മള്‍ മറുകരകള്‍ താണ്ടും. കുന്നിറങ്ങി വരുന്ന കുറ്റ്യാടി പുഴയിലെ ഓളങ്ങള്‍ക്കൊപ്പം നമ്മുടെ മനസ്സും ഒഴുകും. പ്രകൃതിയില്‍ ലയിക്കുക എന്ന് പറയില്ലേ.? അത് സംഭവിക്കുകയാണ് ഇവിടെ നല്ല തണുത്ത വെള്ളം.
മലയിറങ്ങി വന്നു തേയ്മാനം സംഭവിച്ച ഉരുളന്‍ കല്ലുകള്‍ തെളിഞ്ഞ വെള്ളത്തില്‍ കാണാം. ഈ കല്ലുകളില്‍ പ്രകൃതി ശില്‍പങ്ങള്‍ തന്നെ ഒരുക്കിയിട്ടുണ്ട് . അവയ്ക്കിടയിലൂടെ നീന്തിതുടിക്കുന്ന വര്‍ണ്ണ മത്സ്യങ്ങള്‍.
അക്വാറിയത്തില്‍ പോലും ഇത്തരം ഭംഗിയുള്ള മത്സ്യങ്ങളെ കാണില്ലെന്ന് തോന്നുന്നു. ഒരു ഈ തണുത്ത വെള്ളത്തില്‍ ഒന്ന് മുങ്ങി നിവരാതെ പൂര്‍ണ്ണമാകില്ല യാത്ര. കരിയാത്തും പാറ അതിമനോഹരമായ സ്ഥലമാണ്. കരിയാത്തുംപാറയിൽ ഒട്ടേറെ മരങ്ങൾ വെള്ളത്തിനടിയിലും പാതി പുറത്തുമായൊക്കെയായി കാണാൻ കഴിയും..
അതിമനോഹരമായ പുൽമേടുകൾ. കാഴ്ചയ്ക്കു ഭംഗി കൂട്ടുന്ന തരം മരങ്ങൾ... കാനന ഭംഗിയും, കക്കയം മലനിരകളുടെ വശ്യ സൗന്ദര്യവും ആസ്വദിച്ച് യാത്ര ചെയ്യാം.കോഴിക്കോട് ബാലുശ്ശേരിയിൽ നിന്നും പേരാമ്പ്രയിൽ നിന്നും വളരെ അടുത്താണ് കരിയാത്തും പാറ..
കോഴിക്കോട് നിന്നും 45 കിലോമീറ്റര്‍ മാത്രമേയുള്ളൂ കരിയാത്തുംപാറയിലേക്ക്‌. കൂരാച്ചുണ്ട് പഞ്ചായത്തിന്റെ ഭാഗം. എനിക്കുറപ്പുണ്ട് പ്രകൃതിയില്‍ സ്വയം അലിയാനും സ്വപ്നം കാണാനും പ്രണയിക്കാനും ഏകാന്തതയില്‍ ഊളിയിടാനും ആഗ്രഹിക്കുന്ന സഞ്ചാരികള്‍ക്ക് അനുഭവത്തിന്റെ ഉത്സവം ഒരുക്കാന്‍ ഈ പ്രദേശത്തിന് കഴിയും എന്ന്.
ക്യാമറയുടെ മിഴി തുറന്നാല്‍ കാണുന്ന ലോകം മറ്റൊന്ന് എന്ന് തോന്നിപോകും. അത്രക്കും പര്‍ഫക്റ്റ് കമ്പോസിംഗ് പ്രകൃതി തന്നെ ഒരുക്കിയിട്ടുണ്ട് . വിജയദശമി അവധിക്കു നാട്ടില്‍ പോവുമ്പോള്‍ എങ്ങോട്ടെങ്കിലും ഒരു ചിന്ന ടൂറടിക്കണേന്നു വാമഭാഗം മുന്‍കൂട്ടി പറഞ്ഞപ്പോഴേ അതു കരിയാത്തുംപാറ മതിയെന്നു മനസ്സിലുറപ്പിച്ചിരുന്നു. കരിയാത്തന്‍പാറയിലെത്തിയപ്പോള്‍ പൊടിമഴ കൂട്ടിനെത്തി.
കോഴിക്കോടു താമരശ്ശേരി അല്ലെങ്കില്‍ ബാലുശ്ശേരി - കക്കയം വഴിയില്‍ കക്കയത്തിനു മുന്നു കിലോമീറ്റര്‍ മുമ്പുള്ള ഈ മനോഹര തീരം ഒരുപാടാളുകളുടെ ശ്രദ്ധയാകര്‍ഷിക്കുന്ന ഒരിടമാണു. കല്ല്യാണ വീഡിയോക്കാരുടെ പറുദീസയാണിവടത്തെ പുല്‍മേടുകള്‍. നല്ല തെളി നീരൊഴുകുന്ന അരുവിയിലെ മുങ്ങികുളി അടിപൊളി .... തിരിച്ചു പോരുമ്പോള്‍, കാഴ്ച കണ്ടു കണ്ണും മനസ്സും നിറഞ്ഞതോടൊപ്പം കുറേയേറെ സങ്കടവും തോന്നി.
ഇത്ര സുന്ദരമായ ഈ പുഴയോരത്തു ആളുകള്‍ ഉപേക്ഷിച്ചു പോയ പ്ലാസ്റ്റിക് കുപ്പികളും, മാലിന്യങ്ങളും അടിഞ്ഞുതുടങ്ങിയിരിക്കുന്നു. ഈ സ്വപ്നതീരം ഒരു മാലിന്യകൂമ്പാരമായി മാറാതിരിക്കാന്‍ വേണ്ട നടപടികള്‍ ബന്ധപെട്ട സര്‍ക്കാര്‍ സ്ഥാപനങ്ങള്‍ ഉടനടി കെെകൊണ്ടാല്‍ കരിയാത്തുംപാറയുടെ ആരെയും വശീകരിക്കുന്ന ഭംഗി എന്നെന്നും നിലനിന്നേനെ. കോഴിക്കോട് നിന്നും വരുന്നവര്‍ ബാലുശ്ശേരി, എസ്റ്റേറ്റ് മുക്ക് വഴി അല്ലെങ്കില്‍ താമരശ്ശേരി ,എസ്റ്റേറ്റ് മുക്കില്‍ വന്നിട്ടും പോകാം.
Credits: Vinod Kumar
https://www.facebook.com/pg/love.to.traavel/photos/?tab=album&album_id=1367115276696336
No comments:
Post a Comment